20 ألف يتفاعلون مع منشور إضراب أعضاء أولتراس أهلاوي عن الطعام

حقق منشور “بوست” على موقع التواصل الاجتماعي “فيس بوك”، تفاعل ظاهرا نحو 20 ألف متابع، مع فحوى البوست الخاص بإضراب أعضاء أولتراس أهلاوي المقبوض عليهم عن الطعام.

وسجل حساب “Ultras Ahlawy – UA07” قبل ساعات أن “أفراد المجموعة المقبوض عليهم من ٥٠ يوما في القضية الوهمية اللي بيتجدد لهم حبس دون أي دليل بدأوا اليوم إضرابا عن الطعام نتيجة المعاملة السيئة والتعنت معهم داخل السجن من منع دخول الزيارات والتعسف مع الأهالي كل مرة والأكل في السجن مش كفاية ومياه الشرب غير صالحة”.

وعلق الحساب الذي يديره مجموعة من شباب الألتراس “كفاية ظلم”.

وشوهد على البوست تسجيل نجو 17 ألف متابع إعجابهم بالمنشور، كما حظي بمشاركة نحو “2,484 ” بخلاف حجم التفاعل الحقيقي الذي لم يكشف عنه أدمن الصفحة على “فيس بوك”.

وكان من أبرز التعليقات ما قاله أحمد حسن سالم وحظي باعجاب 2 متابع لمنشور الالتراس: “عادل امام في مسلسل #صاحب_السعادة قاعد في مكتب وزير الداخلية.. الوزير بيهدده بيقوله انت ملفك قدامي يا اشيله في الدرج يا اطلعه للناس عادل إمام رد عليه قاله ملف ايه يا فندم أنا راجل تافه أنا لا رجل أعمال ولا لي في السياسة ولا لأنا بتاع #الكورة.. دي حقيقة جمهور الكورة بقا ليه ملف عند سيادة الدولة وبقا من ضمن أولوياتهم إنهم يقضوا عليهم وبالاخص #روابط_الاولترا.. الدولة ليها طار عند الناس دي من ساعة #ثورة_25_يناير وبالأخص موقعة الجمل.. والناس اللي في الحركة هيفهموا أنا اقصد ايه.. مش مكفيهم 92 اتاخدوا غدر م بين افتح بنموت و م بين تدافع كما يدعون.. ده غير شباب الثورة اللي لحد وقتنا ده بيدفعوا ثمن نزولهم ووقفتهم قدام جبروت وطغيان الحاكم بأمره #حسني_مبارك وقمع الغراب #حبيب_العادلي”.

وأضاف “وما زال القمع مستمر مفيش ماتش بيجي غير لازم نسمع ان شباب اتقبض عليهم بداعي.. مرة بداعي التجمهر ومرة بداعي التخريب ومرة بداعي التحريض علي التظاهر بسبب إحياء ذكرى.. الذكرى عند الدولة بقت تظاهر..!!

وأخيرا وليس آخر تهمة إحراز وهمية مش #مخدرات لا ولا #سلاح.. ده تشيرتات كورة واسكارفات 74 وألعاب نارية وأدوات تشجيع.. سبنالكم السياسة بقرفها وفاسدها بكل مافيها من وساخة سبنالكم دولتكلم اعملوا فيها ما يحلوا لكم اسرق انهب كل حق الغلابه اعمل اللي انت عايزه.. وسيب لينا حريتنا سيب لينا #المدرج”.

وسجل أحمد مجموعة من الهاشتاجات منها “#الحرية_للجماهير #الحرية_لبتوع_الكورة #الحرية_للمدرج #الكورة_للجماهير #افتحولنا_المدرج”.

أما عبدالله عبدالستار فكتب “مش كفايه بوستات بقا مش نتحرك احنا طول عمرنا مش بنخاف إشمعنى المرادي #ننزل نجيب حقنا”.