بالفيديو ..”بشرة خير” في غرفة العمليات

تداول نشطاء على مواقع التواصل الاجتماعي مقطع فيديو لعدد من الأطباء، يرقصون على أنغام أغنية “بشرة خير” داخل غرفة العمليات، أثناء إجرائهم عملية جراحية لأحد المرضى، الذي يبدو أنه تحت التخدير.

وتساءل النشطاء عن موقف وزير الصحة تجاه هذا المقطع، معبرين عن غضبهم تجاه “استهتار” الأطباء بحياة مريضهم.

شاهد رقص أطباء داخل غرفة العمليات على “بشرة خير”:

وعلقت Alaa Mojahed على المقطع قائلة: “إذا كان الأطباء بهذا المستوى المتدني من الأخلاق والاستهتار … فما بالك بسواااااهم من أفراد الشعب”.

وقال Ahmed Said:” لما في الصين خدو صورة سيلفي بس جمب مريض أثناء عملية اتشال فيها كل الدكاترة والممرضين اللي كانوا في الصورة واتفصلوا من نقابة الأطباء وده لمجرد صورة، دي الصين؛ انما احنا في مصر.

واستنكرت Shahy Ramzi تبرير البعض لرقص الأطباء داخل غرفة العمليات، متساءلة: “كل اللى برر ووافق على الفيديو ده، أحب أسالك سؤال منك ليها: لو أبوك أو أمك اللى كانوا فى العمليات.. كنت هتقول كده برضه!؟ كنت هتقول وماله ما هم بشر زينا بيهزروا فى الشغل زى ما بنهزر فى شغلنا؟! بلاش أبوك وأمك،، لو كنت انت شخصيا فى العمليات تحت إيد الرقاصين دول، كان هيكون ده موقفك؟!!”.

وتابعت: “قولوا الحق ولو مرة واحدة بدون تبرير، حط نفسك فى الموقف عشان تقدر تحكم صح”.

وقالت Mero Moha:” يا خراااااابى!! ده فى ناس بتبرر .. وفى الآخر المريض يموت تحت إيديهم وهما بيرقصوا ويطلعوا لأهله وهما بيرقصوا ويقولوه: مات، وهما بيرقصوا وأهله يزغرطوا بدل ما يصوتوا”.

وعن غياب المسئولين، سخرت Hala Zain قائلة: “وزير الصحة هوا اللي كان قاعد يصور”.

وقالت Elham Samy:” حسبي الله ونعم الوكيل، أمال لو شاف فيديو فـ ميت فـ تلاجة الموتى، والبهايم عمالين يهزروا حواليه وبيحطولوا سجارة فـ بؤه، وبيصوروا معاه سيلفى، خلاص بقت كرامتنا يدافع عنها كليب ويموت بالوقت ….إمتى هيكون لينا كرامة زي أي شعب …حرام والله”.

وأضافت Esraa Nabel:” ع فكرة أنا ف معهد تمريض وكرهت نفسى أوى لما دخلت المهنة دى، بجد أنا كرهت كل حاجة، دكاترة وتمريض والمستشفيات دى حاجة آخر تسيب واستهتار بجد، امتى مصر تبقى زى الدول المتقدمة؟ ليه إحنا بنتهان كدا والمريض دمه رخيص؟! أنا بجد مش مصدقة!!”.

وكشف Ahmed Fouda أحد الأطباء، عن خطورة ما قام به هؤلاء الأطباء قائلا: “بصراحة شديدة وأنا طبيب …. أولا الخطأ الوحيد إن ممكن يتفك التعقيم …بمعنى إن أصبحت فرصة التلوث عالية”.

وحاول البعض تبرير ما جاء في المقطع، حيث قال Eslam Adel:” إنتوا مش بتتفرجوا على greys anatomy ولا إيه، دي نص جراحين المستشفي بيشتغلوا على أغاني وبيرقصوا في أوضة العمليات وبيتكلموا عن حياتهم الجنسية والشخصية وإيديهم جوه العيان”.

وأضاف Ahmed M. Ezzat:” كل واحد مش عاجبه الفيديو، أحب أقوله خلى رأيك لنفسك … لما تدخل مرة وتحضر عملية يبقى من حقك تتكلم … حتى لو اتشقلب على دماغه طالما عارف هو هيعمل إيه يبقى مش مشكلة … واللى بيقول لو كان والدك أو والدتك أحب أقوله إنت المهم ليك نتيجة العملية”.

وحاولت Enas Mohammed التقليل من فداحة الأمر قائلة: “ومالو، مش بشر زينا محنا بنهزر أحيانا فی الشغل، أکید حالة عادية”.

يذكر أن وزير التعليم العالي، د. سيد عبد الخالق، كان قد صرح بأن “مصر تمتلك مستشفيات أفضل من تلك الموجودة في بريطانيا”، وهو ما أثار موجة من السخرية والغضب بين المواطنين والنشطاء.