عصام سلطان لـ”أبو الفتوح”: اصحى يا نايم .. وحد الدايم”

تداول نشطاء على مواقع التواصل الاجتماعي رسالة أرسلها عصام سلطان نائب رئيس حزب الوسط المعتقل في سجون الانقلاب للدكتور عبدالمنعم أبو الفتوح من داخل اعتصام رابعة عقب الانقلاب العسكري.

وقال سلطان، في رسالته التي حملت عنوان “اصحى يا نايم.. وحد الدايم”: “أخى الدكتور عبد المنعم أبو الفتوح.. بلاش الحنية الزيادة وأنت بتتكلم عن الخائن القاتل المنقلب، وتذكر القسوة والكره لدرجة العمى حين كنت تتكلم عن المنتخب.. أخى الدكتور عبد المنعم.. صدمة الناس فيك كبيرة، هرولت إلى الطرطور بمجرد إشارة، وتمنعت عن المنتخب لمرارة فى نفسك لم تستطع التغلب عليها”.

وأضاف سلطان “أخى الدكتور.. عمرك ما كنت أبدا بتاع لف ودوران، وكلام فى كلام، ومسك العصاية من النص، وتصفية حسابات شخصية بحتة، وسكوت على حق واضح، وطناش على باطل أوضح.. أخى.. تعالى إلى رابعة العدوية، لدعم البسطاء الذين يدافعون عن أصواتهم فى أكثر من عشر جولات انتخابية خلال عامين.. بلاش حكاية الأصوات.. طب تعالى لدعمنا ضد الانقلاب زى ما دعمناك فى الانتخابات.. هى مش السياسة بردو خد وهات، مصالح يعنى..؟ والا انت نظامك وان وى..؟”.

وتابع سلطان “بصراحة أنا مشفق عليك، لا يحطك التاريخ جنب البرادعى وشفيق وبكرى وعكاشة وإلهام ودحلان وبهلوان.. خليك مع الغلابة تكسب.. وشيل الإخوان ومكتب الإرشاد والشاطر والارتكاريا من دماغك”.

واستطرد سلطان “والله العظيم ٨٠% من اللى هنا مهومش إخوان..! دا احنا معانا ليبراليين ويساريين وناصريين، مسلمين ومسيحيين، متدينين ومش متدينين، وفى ناس مابتصليش خالص وما بتصومش وهما أحرار، ومحدش له دعوة بحد، الاحترام المتبادل يسود الكل، وضد الانقلاب، وبس”.

وأردف سلطان “اعتبرنى باتكلم بالنيابة عن أصحابك وأصدقائك وإخوانك وأحبابك اللى زعلانين منك أوى ومش راضيين يكلموك من كتر الزعل، واللى كانوا واقفين معاك فى جولة الانتخابات الأولى، ضد الكل بمن فيهم مرسى، يعنى مش إخوان ولا حاجة”.

وتابع “أسهل حاجة كنا فى الوسط عملنا زيك بالضبط، واتلككنا بخلافنا المعروف مع الإخوان، بس كنا هندوس على مبادئ كتييييير أوى.. ومكناش هنعرف ننام بالليل من تأنيب الضمير.. يا رب نشوفك زى ما كنت زمان، واقف مع الحق من غير حسابات ولا توازنات”.

واختتم سلطان رسالته قائلا: “انت بتفكر فى إيه؟ هو انت وحمدين صباحى فاكرين إن السيسى هيعمل انتخابات رئاسية وهترشحوا نفسكوا مرة تانية..؟ اصحى يا راجل يا طيب.. اصحى يا نايم.. وحد الدايم”.