‫الرئيسية‬ مقالات رسالة إلى الخنزير!
مقالات - ديسمبر 23, 2019

رسالة إلى الخنزير!

د. أحمد غانم

عزيزي الخنزير:

تحية طبية وبعد..

أنا عارف إن أنا لو خيرتك بين أنك تقضي ليلة في مراحيض عامة أوتقضيها في فندق ٥ نجوم فأكيد أنك مش هتختار أي واحد من الاختيارين.. لإن المراحيض العامة فيه احتمال واحد في الألف انها تم تنظيفها وبالتالي أكيد هتبحث بكل جهد عن مزبلة قذرة تتقلب فيها بأمان.. كعادتك

وللأسف ..عشان كده الناس مافهمتش موقفك في موضوع مسلمي الإيغور لأنهم كانوا -بسذاجة- متخيلين أنك هتختار واحد من احتمالين:

١- إنك تناصر مجموعة انسانية مضطهده حتى ولو كنت مش متفق مع آرائهم أو حتى كنت على دين غير دينهم (فندق ٥ نجوم)

أو

٢- تسكت وتكون شيطان كيوت ساكت ومكمل حياتك كخنزير جنتل (المراحيض العامة)

لكن طبعا أنت رفضت الاختيارين دول ووصلت بمجهود كبير للإختيار الثالث (المزبلة مكتملة القذارة) وصرخت بأعلى صوت : “الإيغور ارهابيين وطبيعي ان الصين تحاول تأمن نفسها!”

بس يا عزيزي الخنزير..يعني لو افترضنا إن كلامك صح وإن فيه حوادث “ارهابية” ارتكبتها “جماعة انفصالية” عن الصين فهل ده يبرر للصين مايلي:

١- هل يبرر ذلك عزل ملايين المسلمين عن العالم؟

٢- هل يبرر ذلك وضع عائلات المشتبه بهم في معسكرات اعتقال؟

٣- هل يبرر ذلك فرض شرب الخمر وأكل الخنزير على مسلم حتى يتم اثبات ولائه للدولة؟

٣- هل يبرر ذلك خطف الدولة للأطفال عن عائلاتهم بحجة تعليمهم الولاء للدولة الصينية؟

يعني يرضيك يا عم الخنزير أن واحد ماتعرفوش من قريتك يرتكب “حادثة ارهابية” تقوم الدولة معتقلاك أنت وعيلتك وكل القرية وواخده ولادك وحطاك في معسكر اعتقال؟ ده عادي يعني يا خنزير؟

ويا عزيزي الخنزير يا اللي عمال تردد ده “صراع سياسي” مش “ديني”.. هو أنت لما تعتقل بدون جريمة ويتم ارغامك على عمل أشياء ضد دينك… وولادك الدولة تاخدهم وتربيهم بعيد عنك… ساعتها هتفرق معاك الصراع ده سياسي ولا ديني؟ يعني نروح للناس اللي حياتها ادمرت دي ونقولهم معلهش.. استحمل… اصل الخنزير بيقولك أنه صراع سياسي مش ديني فموت وأنت ساكت وما تطلبش أي دعم من العالم؟…. بس ها اقولك ايه.. ما أنت خنزير..

ويا عزيزي الخنزير.. مش معنى أن أمريكا والغرب متحمسين لقضية الإيجور عشان خلافهم مع الصين نقوم احنا نقول: لا دي معركة بالوكالة مش داخلينها..لا يا عم الخنزير… القضية بتاعتنا..والمسلمين المضطهدين دول تبعنا.. وهننصرهم سواء أمريكا والغرب رضيوا أو لا.. زي ما بننصر اخوانا في فلسطين بغض النظر عن موقف الغرب.. وزي ما بننصر أخوانا في كل مكان فيه اضطهاد حتى ولو الغرب ما ذكرهاش.. الغرب مش بوصلتنا… بوصلتنا هيا ايماننا بإن نصرة المظلوم واجب بغض النظر عن دينه وجنسه وعرقه.. ودي حاجات صعب الخنازير يفهموها للأسف..

عزيزي الخنزير.. ده صراع سياسي.. سيبك منه.. خليك في مزبلتك.. واستمتع بكونك خنزير وسيبك من اللي بيحصل بره مزبلتك..

والسلام ختام..

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *